Монгол улс хөгжихөд амархан, авилгалгүй л болох хэрэгтэй. Би авилгалтай тууштай тэмцэнэ гэдгээ Ц.Элбэгдорж 8 жилийн өмнө Монгол улсын ерөнхийлөгчөөр сонгогдохдоо л амласан. Авилгаас салах юм бол, өргөс авах мэт өвчин намдана ч гэж зүйрлэн хэлж байсан. Түүний хугацаа ирэх оны дундуур дуусна. Гэтэл улс орны хөгжил маань урагшилсангүй, бүр ухарчихлаа. Өвчин эмгэг улам хүндэрч, хөндүүрлэжээ. Тэгэхээр ерөнхийлөгч маань хэлсэн үгэндээ хүрч, авилгалтай тэмцэж чадсангүй гэж хэлж болох нь. Түүний эрх мэдэлд, хууль, шүүх, прокурор гээд бүхий л хүчний байгууллага оршдог. Нэрийг нь дурдаад яах вэ, нэг хүнийг л өнгөрсөн 8 жилийн хугацаанд "нооллоо".
Харин Си Жин Пин болохоор 2013 оноос авилгалтай тэмцэж эхлээд, одоогоор 1 сая гаруй өндөр албан тушаалтныг ажил үүргээс нь чөлөөлж, баривчлан саатуулсан байна. Шанхай хотын дарга, Бээжин хотын татварын дарга зэрэг хүмүүсийг саатуулан хорьж, хууль бусаар олсон, тэрбум тэрбумаар үнэлэгдэн, хэмжигдэх үл хөдлөх хөрөнгө, мөнгө санхүүг нь хурааж, Хятад улсын орлого болголоо. Тэр цаашид ч авилгалтай хийх үйл хэргээ улам гүнзгийрүүлнэ гэдгээ ч тунхаглалаа.
Улс орноо өөд татаж, хөгжүүлэхийн тулд улсын хөрөнгийг гамгүй зарцуулах явдлаа хязгаарлах журмыг төрийн албаны бүх шатны удирдлагад мөрдлөгө болгохыг даалгалаа. Тэр зөвхөн хэлэх биш, бас гардан хийж чаддагаараа дэлхийн улс орны олон удирдагчдыг араасаа дагуулж байна.
Э.ҮҮЛЭНЦЭЦЭГ