Намайг огцруулсны дараа тэрхүү бүлэг санасандаа хүрч, Сайханбилэгээр бүх зүйлээ хийлгэсэн. Оюутолгой, Тавантолгой, Дубайн гэрээ, дээр нь Эрдэнэтийн 49 хувь.
Би өөрөөрөө л байхыг эрхэмлэдэг. Энэ бол миний сурсан зан, өвлөсөн хүмүүжил. Хэн нэгний хүслийг биелүүлэх, эрх ашгийг нь хамгаалах, шуналыг нь гүйцэлдүүлэх зан чанар надад байхгүй. Ард түмнийг баялгийг эздээс нь хулгайлж чадахгүй. Би тэр бүлэглэлийн, тодруулж хэлбэл, монголын улс төр, бизнесийг базсан цөөхөн хүний эрх ашигт үйлчлээгүйн төлөө өнөөдөр ийнхүү адлагдаж явна. Тэд намайг, миний ойр тойрны хүмүүсийг дарамталж байна. 11-ний өдөр эхнэрийг маань гадагшаа явах гэхэд нь хил дээр хориглосон. Гэртээ ирчих гэхээр, ирүүлэхгүй 5-6 цаг саатуулсан. Тэгсэн хэрнээ, түүнээс хойш 10 хоночихоод байхад, ганц ч дуудаж байцаалт аваагүй. Мөн миний хамгийн бага дүүг баривчиллаа. Идсэн уусан юм бол намайг байцаал даа. Ер нь ил тод болгох хэрэгтэй. Би хууль хяналтын байгууллагад хонгил бий болгосон тэр хүн нь Монгол улсын ерөнхийлөгч гээд нэгэнтээ хэлчихсэн байгаа. Үгүй гэвэл, түүнийгээ хэлэх биз.
Би хуулийнхныг бүгдийг нь буруутгаагүй. Шударга хуульчид цөөдөхгүй. Ер нь Монголын нийгэм хэцүү болсон. Монголд бизнес хийх хөрс нь байхгүй болсон. Лицензийг нь дээрэмдэнэ, бизнесийг нь булаана. Эзнийг нь шоронд хорино. Ардчиллын нэртэй 3 хүн төрийн тэргүүнд гарч ирсэн цаг үед л, мөнгийг, бизнесийг дээрэмдэж, шоронд хорьдог боллоо. Монголын төр эрээ цээрээ алдсан. Хүний, өөрийн гэж ялгалгүй дарамт учруулдаг болсон. Женко Баттулгыг шахсан. Түүний эргэн тойрны эмэгтэйчүүдэд эрүү үүсгэж, барьж хорьсон. Төрийн банкны Мөнхбатыг саатуулсан. Энэ баривчилсан хүмүүсээ гэмт хэрэгтэн мэт үзүүлж, сурталчилдаг. Түүндээ төрийн байгууллагыг ашигладаг. Би тэвчээртэй хүн. Гэхдээ одоо болсон гэж үзэж байна. Одоо би дуугүй суухгүй.
Гэхдээ ерөнхий сайд байсан хүний хувьд, юу хэлэх, юу хэлэх заагаа мэднэ. Цөөн хэдэн гэр бүл хагартал баяжиж, олонхи нь үгүйртлээ ядуурч болохгүй. Би монгол иргэдээ дундаж орлоготой, нийгмээ чинээлэг нийгэм болгохын төлөө зүтгэнэ. Үнэнийг хэлнэ. Ялгааг нь гаргана.
Яахаараа ажил хийсэн Фортуна Батбаяр идсэн уусан болдог, өөрсдөө 2 тэрбумыг илүү зардлыг гадныханд зөвшөөрчихдөг, уул уулаар нь идчихдэг, Эрдэнэт УБҮ-ийн 49 хувийг авчихлаар яадаг ч үгүй байна даа. Нөгөө олуулаа болсон МАН-ын 65-ын хүч, зориг нь хааччихав аа? гэж асууя. явчихсан. Тэд яагаад дөлөөд, зугтаагаад байх болов? МАН бол миний дайсан биш, үнэндээ. Тэдний дотор шударга үнэний төлөө явах цөөн боловч гишүүд байгаад талархаж байна.
МОНГОЛ HD ТВ-ИЙН АЛБАН ЁСНЫ ЗӨВШӨӨРӨЛТЭЙГЭЭР, Х.БАТ-ЭРДЭНИЙН ХӨТӨЛСӨН "ХАР ХАЙРЦАГ" НЭВТРҮҮЛГЭЭР ЕРӨНХИЙ САЙД АСАН АЛТАНХУЯГТАЙ ХИЙСЭН ЯРИЛЦЛАГЫГ СИЙРҮҮЛЭВ.