Нийслэлийн ИТХ-ын бүлгийн дарга, МАН-ын ерөнхий нарийн бичгийн даргын үүрэг гүйцэтгэгчийг МАН-ын бага хурлаар жинхэллээ. Тэр нэгэн цагт ерөнхий нарийн бичгийн дарга хийж байсан, тус намын онолч, нэр хүнд бүхий зүтгэлтэн Б.Даш-Ёндонгийн орон зайг эзлэхээр намынхаа бага хурлын гишүүдийн итгэлийг хүлээлээ.
Д.Амарбаясгалан УИХ-ын гишүүн, Засгийн Газрын Хэрэг Эрхлэх Газрын дарга, үеийн нөхөр Ж.Мөнхбатын залгамжлагчаар ийнхүү тодорлоо. Түүний хувьд намынхаа үнэнч гишүүдийн нэг гэдгээ өнгөрсөн хугацаанд эрхэлсэн ажил, зүтгэсэн зүтгэлээрээ харуулсан гэж намын нөхөд нь үнэлдэг. Ялангуяа, МАН нь цөөнх болж, сөрөг хүчний байр сууринд шилжсэн үед, намын нөхдөө уриалан манлайлж, хотын засаг дарга Э.Бат-Үүлийн буруу шийдвэр, алдаатай бодлогыг цаг тухай бүрт нь хурцаар шүүмжилж, бууж өгөлгүй тэмцэж ирсэн. Түүний хүчинд ч, нийслэлд ноёрхлоо бүрэн тогтоосон Э.Бат-Үүл тэргүүтэй нийслэлийн АН-ыг ялж, МАН хотод олонхи болж чадсан гэдэг. Түүний гавьяа зүтгэлийг намын нөхөд нь үнэлж, шинэ цагийн Даш-Ёндон гэж түүнийг нэрлэх болсон.
Тэр одоо МАН-ын хамгийн нөлөө бүхий, хамгийн хүчирхэг хүнээр тодорч эхэллээ. Намын ерөнхий нарийн бичгийн даргын албан тушаал бол УИХ, Засгийн газрын гишүүний суудлаас ч дээгүүр үнэ цэнтэй, нөлөөтэй, үнэлэмжтэй гэдгийг энэ ялдамд дурдахгүй орхиж болохгүй нь. Ийнхүү улс орны хөгжилд нөлөөлөх жинтэй, эрх баригч намын ерөнхий нарийн бичгийн дарга гэдэг бол намын боловсон хүчний бодлого дээр тулгуурлан, улс орны хөгжлийг залах залуурыг атгалаа гэж хэлж болно.
Ц.ЭНХБАТ