Төр, нийгмийн нэрт зүтгэлтэн, Ардчилсан хувьсгалын удирдагч, С.Зориг агсны амь насыг хөнөөсөн хэргийн шүүх хурал 18 жилийн дараа буюу өнөөдөр Хорих 461-р ангид болж байна.
С.Зориг агсны амь насыг хөнөөсөн хэргийг шүүх бүрэлдэхүүнд М.Алдар, Б.Мөнх-Эрдэнэ, С.Оюунчимэг нарын шүүгчид томилогдсон. Яллагдагчаар Ц.Амгаланбаатар нарын гурван хүнийг татсан. Харин улсын яллагчаар Б.Батжаргал, Ж.Сандагсүрэн, хохирогч гэрчээр С.Зориг агсны дүү УИХ-ын гишүүн асан С.Оюун оролцоно.
Нийслэлийн Прокурорын газраас Ц.Амгаланбаатар нарын гурван хүнд холбогдуулан яллах дүгнэлт үйлдэж ирүүлсэн эрүүгийн хэргийг Сүхбаатар дүүргийн Эрүүгийн хэргийн анхан шатны шүүх 10:00 цагт хянан хэлэлцэж байна.
Шүүх хурлыг 30 гаруй хэвлэл мэдээллийн байгууллагын 55 сэтгүүлч сурвалжлахаар хүсэлт гаргасан ч хурлын эхлэл болон төгсгөл хэсэгт камер, хэрэгсэлгүйгээр сурвалжлах боломжтой гэж шийдвэрлэсэн.
Шүүх хурлыг хаалттай хийх учраас хорих 461-р ангийн гадна очсон хэвлэлийнхнийг дотогш оруулаагүй байна. Хурлыг хаалттай явуулах тул утас, камер гэхчлэн бүх техник хэрэгслийг дотогш нэвтрүүлэхгүй, Шүүх хурал болох орчин гар утасны сүлжээ барих боломжгүй байх аж.
Д.БУЯНЖАРГАЛ