.JPG)
Батзандан гэдэг улс төрчийг Монгол даяар мэдэх болжээ. Түүнийг Оросын Либерал намын дарга Жириновскийтэй зүйрлэх нь бий. Яагаад гэвэл, тэр цаг үеийн хурц асуудлыг хэт дэвэргэх, түүгээрээ өөрийнхээ дүр төрхийг бүрдүүлэх дуртай. Тиймээс Жириновскийг тэр тоть мэт дуурайдаг. Тэр иргэний хөдөлгөөнөөс улс төрийн гараагаа эхэлсэн. Өнгөрсөн хугацаанд нийгмийн сэтгэл зүйгээр тэд чадварлаг тоглосныг иргэд хараахан мартах болоогүй.
.jpg)
Улс төрийн намыг алхам тутамдаа шүүмжилж байсан Уянга, Ичинноров, Ганбаатар, Магнай нар бүгдээрээ иргэний хөдөлгөөнөө орхиж, нам бараадацгаасан. Ёстой л уулын буга харж, унасан бухаа сольсон гэдэг үлгэр үзүүлсэн. Уянга Монголын Үндэсний Ардчилсан намаар дамжин УИХ-ын гишүүнээр сонгогдсон. 2016 онд Баттулгын гэх тодотголтой нэгэн шинэ намын дарга болж, сонгуульд оролцсон ч унасан. Өөрөө өөрийгээ унагасан гэх тодотгол Уянгын гардан хийсэн Эрдэнэчимэг гишүүний тухай бичлэгтэй холбоотой. Эмэгтэй хүн байж эмэгтэй хүнээ хайрладаггүй, хаяагаа хадардаг, өөдгүй, гэх мэт үгийг сошиал ертөнцөөр түүнд хаягласан. Түүнийг хүн биш гэж үзсэн. Тиймээс ч, хамгийн өндөр рейтингтэй байсан Уянгыг сонгуулиар зайлуулсан. Магнай нь, АН-аас Сонгинохайрханд дэвшээд унасан. Харин ХҮН намын дарга болсон Ганбаатар төдөлгүй намаасаа гээгдэж, мөн л бие даасан боловч, түүнийг дахин сонгохоос Дарханчууд татгалзсан. Ичинноров нь "үгүй хийж устгах ёстой гэж хэлж байсан МАН-даа элсэж, улс төрийн карьераа өсгөхийг хичээсэн ч" бүтэлгүйтсэн. Ийм нэгэн хамтрагчид түүнийг чимдэг. Найзаар нь хэмжиж, Батзанданг тодорхойл гэвээс ийм л нэг бүтэл муутай дүр зураг харагдана.
Харин тэр Баянзүрх дүүргээс дахин сонгогдсон боловч, дүүрэг дотроо тойргоо сольсонд өмнөх тойргийн сонгогчид нь дургүйцдэг. Тэр өөрийн сонгогдсон тойрогтоо хийж байгуулсан гавьяагүй учир АН-ын дараачийн нэр дэвшигчид гай тарьсан ч гэдэг. Түүний "сайн" тал бол ах, дүүгээ болон УИХ-д өөрийгээ гишүүнээр сонгогдоход нэг баг болон ажилласан хүмүүсээ бүгдийг нь өөд татаж, ямар ч үнээр хамаагүй зүтгүүлж байж, ажил төрөлтэй золгуулсан гэдэг. Тэр ийм л ажлыг амжуулсан. Өөртөө л зүтгэсэн хүмүүсийн төлөө тэр зүтгэсэн. Тэр өөртөө л ажиллажээ. Харин улс ниймийн төлөө тэр зүтгэсэнгүй. Тэр одоо АН-ын даргын суудлыг сэрүүн зүүдэлж явна. 250 сая төгрөгийн босгыг анхандаа эсэргүүцэж байсан тэрбээр, тэр мөнгөө намдаа өгсөн төдийгүй, аймаг аймагт мөнгөжүү бийлэгжүү явна гэх мэдээлэл цацагдах болов. Оргүй биш гэнэ. Тэр энэ мөнгөө С.Эрдэнээр гаргуулсан мэт цуу тарааж, өөрөө энхийн цагаан тагтаа болохыг бас мөрөөдөж байна. Батзандан хөрөнгөжжээ...
Тэр иргэдийн сэтгэл зүйгээр чадварлаг тоглож сурсан зангаараа АН-ын орон нутаг, анхан шатны гишүүдийн сэтгэл зүйгээр тоглохыг эрмэлзэж байна. Гэвч түүний хэлэх, хийх хоёрын хооронд ялгаа бий гэдгийг АН-ын жирийн гишүүд хэдийнээ гадарлах болсон. Батзандан бол "ердөө л тоть" шувуу ч гэх нэгэн байна. Бууж сууж, энүүхэн тэрүүхэнд нисэх аядах эрээн тоть биш, өндөрт дүүлэн нисэх чадвартай, хүчтэй даль жигүүртэй, хурц хараа, дайчин чанартай бүргэд мэт жигүүртнээр АН-аа удирдуулна хэмээн тус намын жирийн гишүүд хүсэн хүлээж байна. Тоть яаж ч санаархсан, бүргэдийн дэвэлтээр хэзээ ч нисэж чадахгүй. Тоть бол тоть, бүргэд бол бүргэд ажээ.
Ц.ЭНХБАТ
