Ардчилсан хувьсгалын ахмад зүтгэлтнүүд, анхдагчид, партизануудад төрөөс ямар нэгэн хөнгөлөлт, урамшуулал олгодоггүй. Ардчилсан намын бүлгийн дарга С.Эрдэнэ эдгээр хүмүүс 70 жил оршин тогтносон коммунист нийгмийг үндсээр нь өөрчилж, шинэ Ардчилсан Монгол Улсыг бий болгоход түүхэн гавьяа байгуулсныг үнэлэх цаг нь болсныг онцолж байна. Тэдний хүчээр л бид анхны ардчилсан парламентыг хуралдуулж, анхны ардчилсан Үндсэн хуулиа баталсан. Тиймээс эдгээр хүмүүсийн түүхэнд гүйцэтгэсэн үүргийг бодитоор үнэлж төрөөс хөнгөлөлт, урамшуулал олгох зорилгоор хуулийн төсөл санаачилж, боловсруулах зорилготой Ажлын хэсэг байгуулж УИХ дахь Ардчилсан намын бүлгийн дарга С.Эрдэнэ өөрөө ахалж байгаа юм. Тэрчлэн МоАХ-ны тэргүүн Х.Баттулгад Ардчилсан хувьсгалд оролцож явсан ахмадуудын судалгааг орон даяар гаргаж энэ оны гуравдугаар сарын 1-ний өдөрт багтаан УИХ дахь Ардчилсан намын бүлэгт ирүүлэхийг хүсч албан тоот явуулжээ. 1990 оны Цагаан морин жилийн Ардчилсан хувьсгалд оролцсон ардчиллын ахмад зүтгэлтнүүд та бүхнийг судалгаандаа идэвхтэй хамрагдахыг уриалж байна.