.JPG)
Монголын хамгийн эрдэм номтой, ухаан суусан, удирдлагын зузаан туршлагатай, зангарагтай, эх орон, ард түмнээ гэх сэтгэлтэй нэгэн Монгол улсын ерөнхийлөгчид нэр дэвшдэг гэж иргэд санадаг. Ийм явдал Монголын хамгийн анхны ерөнхийлөгчийн сонгуулиар эхлээд, түүгээр төгсгөл болсон. П.Очирбат, Л.Түдэв гэж хоёр том сэхээтэн өрсөлдөж, Л.Түдэв телевизийн халз ярилцлагад алдаа гаргаж ялагдсанаар Очирбат ерөнхийлөгчөөр сонгогдсон. Түүнээс хойш "Хийгүй" Н.Багабанди, "Хийдэг" Н.Энхбаяр, "Хэлдэг" Ц.Элбэгдоржтой өнөөг хүрлээ. Эрх баригч, сөрөг хүчний намын дарга нар л ээлжлэн сонгогдох болсон. Хоёрхон нам л Монгол улсын ерөнхийлөгчийн суудлыг эзэгнэж ирсэн. Энэ жил ч мөн адил МАН, АН-аас л нэр дэвшигч ялах магадлалтай гэж судлаачид дүгнэж байна. МАН-аас тус намын дарга М.Энхболд нэр дэвших хамгийн өндөр магадлалтай. Намдаа хүлээн зөвшөөрөгдсөн. Гэхдээ Ц.Нямдорж, Н.Энхболд нарын нэр яригдаж буй.
Харин АН-ын хувьд намын даргын сунгаа нэрийн дор АН-ынхаа нэр хүндийг сэргээн өргөх ажлыг хийж амжсан. Боломжийн суурь тавьсан. Нэр дэвшигчээ сунгаагаар тодруулах чиглэлтэй байгаа. Харьцангуй ардчилсан хэлбэрээр нэр дэвших нь ойлгомжтой болсон. Ямар ч гэсэн намын дарга нь нэр дэвшдэг уламжлалыг эвдэх бололтой. Нэр дэвшигчийн хувьд, Р.Амаржаргал гэсэн нэр хамгийн их хоногшсон. Бусдаасаа илүүрхэх магадлалтай. Хэрвээ Амаржаргал дэвшсэн тохиолдолд М.Энхболдод маш хүнд тусах болно. Харин МАХН-ын хувьд нэр дэвшүүлэх эрхтэй ч, тоглолтонд нөлөө үзүүлж чадахгүй гэж үзэх, тайлбарлах судлаачид байна. Ерөнхийлөгчийн сурталчилгаа үндсэндээ эхэлсэн. Энэ цагаан сар бол сурталчилгааны хүчтэй эхлэлийг тавина гэж улс төр судлаачид хүлээж байна.
Ц.ЭНХБАТ
