Монголчууд дэндүү амар амгалан. Сүх далайтал үхэр амар гэдэг шиг эцсийг нь хүргэдэг заншилтай. Яг ингэж явсаар Монгол улс эдийн засгийн сүйрлийн ирмэгт ирснээ сая л нэг ухаарсан. Улсаа дампуурсныг зарлах, эдийн засгаа өөрөө удирдаж чадахгүйгээ хүлээн зөвшөөрөхөд хүрсэн. Түүний тод илрэл бол ОУВС-аас зээл авсан үйл явц. Энэ бол дампуурлын өмнөх шат дамжлага. Энэ шат дамжлагыг Монголчууд 5 дахь удаагаа туулах гэж буй нь гунигтай түүх буюу, сургамж авдаггүй буюу ухаардаггүй гэсэн дүгнэлтийг араасаа дагуулна. Монгол улс бол дүрэмгүй тоглодог улс төрчдөөр дүүрсэн, хувийн болоод санхүүгийн ямар ч сахилга батгүй гэдгээ нотолж буйн нэг илэрхийлэл гэж үзэхэд хүргэсэн. - Зөвхөн намын эрх ашиг, хувийн эрх ашиг, сонгогчдод таалаглах, тэдний саналыг "худалдан авахад" чиглэсэн алсын хараагүй бодлогын үр дагавар нь улс орноо дампууруулахад хүргэсэн. Үүнийг зөвшөөрөхөөс өөр арга зам үлдээгүй. Бид алдаанаасаа сургамж авч, түүнийг давтах биш засах учиртай. Тиймээс Монголын төр нь төр шиг, Монголын Засгийн газар нь Монголын Засгийн газар шиг эрх үүргээ ухамсарлан ажиллах цаг болжээ. Бид нэг намын буюу, эрх баригч намын Засгийн газар гэдэг 26 жилийн турш амь бөхтэй тогтнож ирсэн уламжлалыг зоригтой хална. Монголын Засгийн газар бол Монголын л засгийн газар байх болно гэж Монголын Засгийн Газрын Хэрэг Эрхлэх Газрын дарга, УИХ-ын гишүүн Ж.Мөнхбат сэтгүүлчидтэй уулзахдаа онцоллоо.
О.НАНСАЛМАА