Гарамгайбаатар, Фортуна Батбаяр нарыг хорьж, тэдний ойр тойрны хүмүүсийг шалгаж буй мэдээлэл саяхнаас л өрнөлөө. Уул нь энэ асуудлыг хууль хяналтынхан эртнээс сөхөж, асуудал үүсгэж байсан ч, УИХ-ын гишүүний дархан эрх гэдэг бат бөх хамгаалалтыг яаж ч давж чадалгүй өдийг хүрсэн нь энэ. Тэд дан болон давхар дээлээ тайлцгаасан учир тэднийг байцаах, хорьж цагдах боломж нээгдсэн нь энэ гэж хэлж болно. Улсын өмч хөрөнгийг үнэхээр хайр гамгүй үрэгдүүлж шамшигдуулсан. Бондын мөнгөөр дураараа тоглов. Зам барина гэдэг нэрээр хөрөнгө мөнгийг хэрхэн завшсаныг Гарамгайбаатарын үйлдэл гэрчилнэ. Хэнтий рүү машинаар явж үзсэн хүн бүр Гарамгайбаатарыг "хараадаг". Зам гэж там. Нөгөө Дамба -Очирын адил. Тэд гэмт хэргээс өөрсдийгөө хаацайлах гэж УИХ-д шигддэг. Энэ удаа харин тэд хамгаалалтад орж чадалгүй ийнхүү шалгуулж эхэллээ.
Тэдний араас шалгуулах хүний урт нэрс гарчээ. Зарим нэг түшээд гэр бүл, үр хүүхдээ аван харийн оронд удаан хугацаагаар амьдрахаар мордсон мэдээ мэдээлэл ч чих дэлсэх болов. Гишүүдээ баригдах, хоригдохыг харсан УИХ -ын гишүүн, УИХ дахь АН-ын бүлгийн дарга Д.Эрдэнэбат, -Бид гишүүдээ хамгаална, гэхдээ буруу үйл хийсэн бол хаацайлахгүй гэж хэллээ. Их шалгалт эхэллээ, экс лидерүүд болгоомжтой байгаарай гэж анхааруулья.
Д. ГАНАА