.JPG)
Албан тушаал гэдэг хүчтэй юм. Хооронд нь эвлэрүүлэн тэврэлдүүлдэгч, өстөн болтол дайсагнуулах ид шидтэй аж. Албан тушаалын хуваарилалтаас болж намын лидерүүдийн уур уцаар өдий хүртэл гараагүй явна. 2016 оны УИХ-ын сонгуулийн үеэр Ц.Нямдорж УИХ-ын даргын сэнтийг намын даргадаа захиалсан ч М.Энхболд сөрөөд тэр суудалд нь тухалчихсан. Түүнд бүлгийн дарга гэх хоосон сэтэр зүүсэнд Нямдорж дургүйцсэн. Түүнийгээ ч илэрхийлсээр. Лам олдохгүй бол буцахдаа зална гэгчээр Ховдын хүү Бямбацогтыг татаад унагачихвал Хууль зүйн сайд болчих хүсэл байдаг. Тэгсэн хэрнээ УИХ-ын даргын суудал онгойвол очоод суучих санаагаа мөн л орхиогүй хэвээр. Гэтэл хэл амаараа түүнээс дутахгүйгээ харуулсан Дарханы Хаянхярваа өрсчих гээд өндөлзөөд байх нь зовлонтой. Мөн ерөнхийлөгчид нэр дэвшвэл ч гэж бас санах. Арга барахдаа, - Энхболдынхоос миний рейтинг хамаагүй өндөр байгаа шүү гэж хэлж үзэж байх жишээтэй. Нямдоржийн ааш маягийн хажуугаар МАН-ын даргын албан тушаалыг авчих, цаашлаад ерөнхий сайд болчих хүслээ нуухгүй залуу үеийнхэн гараад ирчихсэн, намын дарга, ерөнхий сайд болсон мэт аяглах. Энэ бүхнээс их газар хөдлөлтийн өмнөх зөөлөн чичиргээг мэдэрч болох.
Энэ оны 10-р сараас хэтрэхгүй МАН дотор хүчний маш том хуваарилалт явах болно гэж хөндлөнгийн ажиглагчид дүгнэж эхэлсэн ч оргүй зүйл биш. Тэгэж байтал намын ахмадууд нь бас зүгээр сууж чадсангүй. Тэд намын дарга М.Энхболдод хандан, - "Та намын даргаа өгвөл МАН-д дэндүү их хөдөлгөөн орох нь. Нам хохирох хандлага байна. Даргаа та намаа бодооч. Таны нас залуу байна. 2021 онд таныг дэвшүүлье. Энэ жил Ө.Энхтүвшинг дэвшүүлэх нь зөв" гэсэн санаачлагыг дэвшүүлсэн нь М.Энхболдын уурыг ч бас барж байгаа сурагтай.
Ц.ЭНХБАТ
