Ардчилсан намын гишүүн Д.Дорлигжав ирэх Ерөнхийлөгчийн сонгуульд нэрээ дэвшүүлнэ хэмээн мэдэгдлээ. Ирэх зургаадугаар сарын 26-нд товлогдоод байгаа Монгол Улсын тав дахь Ерөнхийлөгчийг сонгох сонгуульд Ардчилсан нам нэр дэвшүүлэх хүнээ сунгаагаар сонгох бөгөөд энэ сунгаанд оролцоно хэмээн Д.Дорлигжав хэллээ. Тэрбээр Ерөнхийлөгчийн сунгаанд оролцох шийдвэрээ сарын өмнө гаргасан гэв. Ийм шийдвэр гаргахад улс оны эдийн засаг, улс төрийн өнөөгийн байдал нөлөөлсөн гэсэн юм.
Өнөөдрийн байдлаар АН-аас хэд хэдэн эрхэм Ерөнхийлөгчийн сонгуульд нэр дэвшихээр нэр нь дуулдаж буй. Албан ёсоор Ерөнхий сайд асан Н.Алтанхуяг, мөн Хотын дарга асан Э.Бат-Үүл ч нэр дэвшинэ гэсэн юм.
Тэгвэл өнөөдөр Хууль зүйн сайд асан Д.Дорлигжав АН-аас Ерөнхийлөгчийн сонгуульд нэрээ дэвшүүлэх болсоноо албан ёсоор зарлаад байгаа нь энэ. Юутай ч АН-аас Ерөнхийлөгчийн сонгуульд нэр дэвших эрхмүүд эхнээсээ тодорч байна. Гэхдээ намын дотоод сонгуульд ялсан тохиолдолд Ерөнхийлөгчийн сонгуульд өрсөлдөх юм.
Ч.БЯМБАА