Испанийн төв хэсэг, Мадридаас өмнө зүгт орших Толедо мужийн Урда, Лос-Йебенес суурингийн хооронд лхагва гарагийн өглөө 09:00 цагийн дараахан хурдны хоёр галт тэрэг мөргөлджээ. Мадридаас Севилья чиглэлд явж байсан хоёр галт тэрэгний нэг нь зам дээр зогсож байсан бөгөөд нөгөө нь түүний араас өндөр хурдтайгаар мөргөсөн байна. Мөргөлдөөний улмаас хэд хэдэн вагон замаасаа гарч, далан руу унажээ.
Ослын шалтгааны талаар Испанийн Тээврийн сайд Оскар Пуэнте мэдэгдэхдээ, зогсож байсан галт тэрэгний улмаас зам дээр улаан дохио идэвхтэй байсан ч Renfe-ийн галт тэргийг явахыг зөвшөөрсөн нь дүрэм зөрчсөн алдаа байсан гэжээ. Сайдын хэлснээр улаан дохио нь компьютерийн холбооны саатлаас болж автоматаар асч, хөдөлгөөнийг зогсоосон байсан бөгөөд хувийн Iryo компанийн галт тэрэг дэд бүтцийн менежер Adif-ийн заавраар дохионы саатлын улмаас зам дээр зогссон байжээ. Renfe компани мэдэгдэлдээ, галт тэрэг нь зааврын дагуу явж байхдаа зогсож байсан галт тэргийг мөргөсөн, үйл явдлын дарааллыг мөрдөн шалгалтаар тогтооно гэжээ.
Кастилья-Ла Манча мужийн Засгийн газрын тэргүүн амиа алдагсдын тоо 68-д хүрснийг мэдэгдсэн бөгөөд аврагчид вагон бүрийг нэг бүрчлэн шалгаж, хохирогчдыг эрэн хайх ажил үргэлжилж байгаа тул тоо цаашид өсөх магадлалтайг албаныхан анхааруулж байна. Эхний мэдээллээр 10 хүн амиа алдсан гэж байсан тоо ийнхүү өдрийн турш огцом өссөн юм.
Мөргөлдсөн Iryo галт тэргэнд 147, Renfe галт тэргэнд 397 зорчигч явсан байна. Олон арван хүн бэртэж, эмнэлгүүдэд хүргэгдсэн бөгөөд Эрүүл мэндийн сайд Моника Гарсиа иргэдийг цусаа хандивлахыг уриалжээ. Ослын газарт түргэн тусламж, нисдэг тэрэг, цэргийн онцгой байдлын анги ажиллаж, ойролцоох Урда сууринд зорчигчдыг хүлээн авах байр бэлтгэсэн байна.
Зорчигчид хүчтэй донсолгоо, асар их чимээ сонсогдсоныг ярьжээ. Зарим зорчигч цус болсон, боолттой байдалтайгаар нүүлгэн шилжүүлэгдсэн бол аврагчид эвдэрсэн вагонуудаас хүмүүсийг гаргахаар олон цаг ажилласан байна. Мадрид—Андалуси чиглэлийн хурдны галт тэрэгний хөдөлгөөнийг бүрэн зогсоожээ.
Испанийн Ерөнхий сайд Педро Санчес осолд цочирдсоноо илэрхийлж, газар дээр нь очихоор явсан бөгөөд сөрөг хүчний Ардын нам сонгуулийн кампанит ажлын арга хэмжээнүүдээ цуцалжээ. Испанид ирэх сарын 29-нд сонгууль болох гэж байгаа энэ үед осол улс төрийн хэлэлцүүлгийг ч өрдөж байна.
Энэ осол нь Испанийн хувьд энэ оны хоёр дахь том галт тэрэгний гамшиг юм. Нэгдүгээр сард Кордова мужийн Адамус орчимд мөн л Renfe болон Iryo-ийн галт тэрэгнүүд мөргөлдөж 46 хүн амиа алдсан билээ. Лхагва гарагийн осол нь 2013 онд Сантьяго-де-Компостела орчимд 80 хүний аминд хүрсэн ослоос хойш Европт гарсан хамгийн олон хүн амиа алдсан төмөр замын осол боллоо гэж Reuters мэдээлжээ.
Мөрдөн шалгалт үргэлжилж байгаа бөгөөд дохиоллын саатал, хөдөлгөөн сэргээх шийдвэр яагаад гарсан нь шалгалтын гол асуулт болж байна. Сүүлийн жилүүдэд ослын тоо нэмэгдэж, хурдны төмөр замын засвар үйлчилгээний хөрөнгө оруулалт хангалттай эсэх талаарх маргаан Испанид аль хэдийн өрнөөд байсан нь энэ гамшгийн дараа улам ширүүсэх төлөвтэй байна.
Та юу гэж бодож байна — улаан дохио асч байхад галт тэргийг явуулсан шийдвэрийг гаргасан хүмүүст ямар хариуцлага хүлээлгэх ёстой вэ?
Эх сурвалж: Reuters
