Оксфордын их сургуулийн судлаачид International Journal of Cancer сэтгүүлд нийтлэгдсэн судалгаандаа Их Британийн бараг нэг сая насанд хүрэгчдийн эрүүл мэндийн мэдээллийг 10 гаруй жилийн турш ажигласан байна. Оролцогчдоос ердийн халуун ундаагаа "бүлээн", "халуун" эсвэл "маш халуун" гэж тодорхойлохыг хүссэн ажээ.
Бүлээн ундаа уудаг хүмүүстэй харьцуулахад халуун ундаа уудаг хүмүүсийн улаан хоолойн хавтгай эсийн хорт хавдар (SCC) тусах эрсдэл бараг хоёр дахин, маш халуун ундаа уудаг хүмүүсийнх ойролцоогоор гурав дахин их байсан байна. Өдөрт зургаа буюу түүнээс олон халуун ундаа уудаг хүмүүсийн эрсдэл 71 хувиар их байжээ.
Эрдэмтдийн үзэж байгаагаар маш халуун шингэнийг дахин дахин уух нь улаан хоолойн салст бүрхэвчийг цочроож, гэмтээдэг бөгөөд цаг хугацааны явцад энэ нь хорт хавдар үүсэх эрсдэлийг нэмэгдүүлдэг байна. Олон улсын хорт хавдрын судалгааны агентлаг 65 хэмээс дээш халуун ундааг "хорт хавдар үүсгэж болзошгүй" гэж ангилдаг ажээ.
Судалгааны зохиогчид цай, кофегоо бага зэрэг хөргөж уух нь энгийн урьдчилан сэргийлэх арга болохыг зөвлөж байна. Мөн тамхи татахгүй байх, архины хэрэглээг хязгаарлах нь улаан хоолойн хорт хавдраас сэргийлэх хамгийн сайн арга хэвээр байна.
Эх сурвалж: The Week, Оксфордын их сургууль
