Сүүлийн үед хуурай шампунь нь ажил ихтэй хүмүүсийн хэрэглээ болоод байгаа. Учир нь цаг зав гаргаж үсээ угааж амждаггүй хүмүүс маш богино хугацаанд тослогтсон үсээ хөвсгөр зөөлөн болгох гэж хуурай шампунийг хэрэглэх болжээ. Гэхдээ энэ бүтээгдэхүүнийг өдөр тутамдаа хэрэглэх нь үс хагтаж хуурайших, загатнах, хуйхан дээр тууралт үүсэх бүр цаашилбал ус унах эрсдэлтэй гэдгийг үсчин гоо сайханчид зөвлөлөө. Учир нь хуурай шампунийн найрлагад орсон тослогийг өөртөө шингээдэг бодис нь хуйхыг хуурайшуулж, хаг үүсгэхэд нөлөөлдөг байна. Энэ бодис хуйхан дээр удаан хугацаагаар байснаас болж арьсны сүв бөглөрч улмаар тууралт үүсгэдэг. Мөн энэ бүтээгдэхүүнийг ихээр хэрэглэснээр үс гэнэт их хэмжээгээр унах сөрөг нөлөөтэй. Тиймээс энэ бүтээгдэхүүнийг тохируулж хэрэглэхийг зөвлөе.
БЭЛТГЭСЭН : А. РЕНЧИНДОРЖ
