а.Төмс хатаах : Төмсийг эхлээд бүлээн усанд хийж сайтар угаагаад хальсалж нахиаг нь ухаж аваад усанд хийж хэсэг байлгана. Төмсийг үүний дараа дугуй буюу гонзгой хэрчиж буцламгай халуун усанд хийж 3-5 минут хэртэй болгоод шүүж хүйтэн усаар шүршиж хөргөнө. Ингэсний дараа хатаах шүүгээнд 70-80 хэм дулаанд 20-30 мин болгох буюу нарны элчээр хатаана. Мөн төмсийг бүхлээр нь чанаж хальсыг нь аваад махны машинаар машиндаж дэлгэж хатааж болно.
б.Улаан манжин : Бүлээн усанд мөлчийтөл угааж буцламгай усанд бүхлээр нь хийж 10-15 минут байлгаж дутуу болгоно. Хатаах шүүгээнд бол 60-65 хэм халуунд 20-25 минут байлгаж хатаана. Төмсний адил хэрчинэ.
в. Шар лууван : Гол нь хөндийрөөгүй улаан шаргал өнгөтэй булцууг сонгон авч хальсыг арилгаж бүлээн усаар угаагаад буцламгай усанд 15-20 минут зөөлөн буцалгаад хоолны гурил шиг хэрчиж хатаах шүүгээнд нимгэн үеэр дэлгэж хатаана.
г. Бөөрөнхий байцаа : Боолт сайтай, хайрагдаж хөлдөөгүй байцааны гаднах хальсыг авч нарийн хэрчээд 65-70 хэмд хатаана.
д. Чинжүү : Хэлхэж нар салхинд өлгөх буюу тавиур дээр задгай дэлгэж хатааж болно. Үрийн суулт багатай махлаг жимст чинжүүг хатааж хэрэглэнэ. Хатаах чинжүүг хөндлөн 2 хуваагаад зүсэгдсэн талыг дээш харуулж хавтгай модон дээр тавьж хатаана. Мөн жимсийг тууш чиглэлд 4-6 удаа сийлж зүсээд нарийн хэцэн дээгуүр тохуулж 4-5 хоног хатаана. Жишээлбэл : Бөөрөнхий сонгиныг гаднах хальснаас нь салгаж булцууг хөндлөн чиглэлд 3-4 см өргөнтэй хэрчиж хатаах шүүгээнд 65 хэмд хатаана.
Д. АРИУНБААТАР / Зөвлөх инженер /