Монгол оюутан А.Амарбаяр "Амазон" компанийн “Operational Excellence” шагналыг хүртжээ. Тэрбээр MUM буюу Махарашигийн Менежментийн их сургуульд суралцдаг аж. Мэдээлэл технологийн чиглэлээр суралцдаг тэрээр “Амазон” компанид эхний жилдээ дадлага хийж байгаа юм байна.
“Амазон” компаниас түүний программ хангамж, хөгжүүлэлтийн инженерийн багт оруулсан хувь нэмрийг үнэлэн сарын шилдэг ажилтнаар онцлон тус шагналыг олгожээ.
А.Амарбаяр дата өгөгдлийн процессыг инженерүүд гар аргаар явуулдаг байсныг автоматжуулах шинэ санаа гарган багийнхаа гишүүнтэй хамтран ажилласан байна. Ингэснээр инженерүүдэд тулгардаг ажлын асуудлыг 86 хувиар бууруулж, ажилтнуудын цагийг хэмнэх үр дүнтэй шийдэл болжээ. Одоо А.Амарбаярын санаачлан хэрэгжүүлсэн тус автоматжуулалтын системийг “Амазон” компанийн инженерүүдийн 12 баг ашиглаж, ажлын ачааллыг долоо хоногт 2-3 цагаар хөнгөлөх болсон байна.
Өнгөрсөн аравдугаар сард АНУ, Канад, Энэтхэг дэх “Амазон” компанийн удирдлагын багийн уулзалт болж, А.Амарбаярын санаачлан хийсэн автоматжуулалтын ажлыг өндрөөр үнэлж, дээрх шагналыг олгохоор шийдвэрлэжээ.
Уг шагналыг компанид дадлага хийж буй, анхлан суралцагч оюутан хүртэж буй нь тухайн оюутныг өндрөөр үнэлж, хүндэтгэл үзүүлж буй хэрэг, түүнд маш том ирээдүй, боломж байгаа тухай компанийн цахим хуудсанд бичжээ.
Эх сурвалж : MGLRADIO.COM