Оросын багийн рейтинг суга өссөн. Тэд гараагаа гайхалтай эхэлж, эхний 2 тоглолтонд 8 гоолыг өрсөлдөгчийнхээ хаалганд зоосон бол хөлбөмбөгийн гигант болох Испанийн багтай 1:1 -ээр тэнцэж, торгуулийн цохилтоор тэднийг мулталсан. Тоглогчид нь итгэлтэй цохиж, хаалгач Акинфеев өрсөлдөгчийнхээ хоёр ч цохилтыг хааснаар тэд шилдэг наймад үлдсэн. Дараачийн учраа бол тун жигдхэн тоглолтыг үзүүлж буй Хорватын баг. Модрич, Ракитич нарын европын шилдэг багуудад тоглодог ур чадвар өндөр бүхий залуусаас бүрдсэн хүчирхэг баг Оросын багийн эсрэг зогсох болно. Зогсоо зайгүй довтлох нь ойлгомжтой. Оросууд сөрөг довтолгоонд л найдах болно. Аз түшиж Хорватыг "унагавал" Английг сөхрүүлчих боломж Оросын багт бий гэдэгт Оросын Хөлбөмбөгийн Холбооны удирдлага итгэлтэй байна. - Хорваттай хийх тоглолт бол Оросын багийн хувьд хамгийн хариуцлагатай, үнэ цэнтэй тоглолт байх болно. Энэ тоглолт бидний сүүлчийн тоглолт ч байх магадлалтай. Энэ бол бидний хувьд финалын тоглолт. Тиймээс бид бүхнээ зориулах болно гэж Черчесов хэлэв.
Ц.ХИШГЭЭ