1996 онд гарсан "I believe I can fly" дуугаараа дэлхийд танигдсан дуучин R Kelly (Роберт Сильвестр Келли)-д охид эмэгтэйчүүдэд бэлгийн дарамт үзүүлсэн хэргээр 30 жилийн хорих ял оноолоо. Мөн мөнгөн торгууль төлөхөөр болжээ.
Өдгөө 55 настай тэрээр 2019 оны долоодугаар сараас хойш хоригдож байгаа бөгөөд шүүхийн шийдвэр гарсны дараа түүнийг Брүклинээс Чикаго руу шилжүүлэн ирэх наймдугаар сард хүүхдийн порнограф бичлэг хийсэн мөн шүүх ажиллагаанд саад учруулсан хэргээр шүүхэд дуудах юм байна. Дараа нь Иллиноис болон Миннесотагийн шүүхэд дуудагдах гэнэ.
Дуучин R Kelly хүүхэд байхдаа бэлгийн хүчирхийлэлд өртөж байсан бөгөөд энэ нь сэтгэл зүйд нь нөлөөлж, бэлгийн буруу зуршилтай болсон тул түүнд 10-аас дээш жилийн хорих ял өгөхгүй байхыг дуучны өмгөөлөгч Женнифер Бонжан хүсжээ. Тэрээр "Келлигийн үйлдсэн гэмт хэргийн ихэнх хувь нь олон жилийн өмнө болсон. Тиймээс үйлчлүүлэгч маань одоо нийгэмд аюулгүй. Доктор Диц, Сорентино нарын дүгнэснээр үйлчлүүлэгч маань бэлгийн гаж донтон биш" гэжээ. Харин прокурорууд түүнд доод тал нь 25 жилийн хорих ял оноох ёстой, учир нь өөрийн нэр хүндийг ашиглаж хохирогчдыг татаж байсан бөгөөд энэ үйлдэлдээ огтхон ч харамссан шинжгүй байгаа учраас нийгэмд аюултай гэж үзсэн үзжээ.
Шүүх хурлын явцад яригдсан дуулиант нэг хэрэг нь дуучин Алияатай 15 настай байхад нь эцэг эхээс нь нууцаар гэрлэсэн явдал байв. Келли түүний анхны "Age Ain't Nothin' But A Number" цомгийг продюсерлэсэн байна. Келлигийн менежер тухайн үед Алияагийн төрсний гэрчилгээг хуурамчаар үйлдэхийн тулд хахууль өгч байснаа шүүхэд хүлээн зөвшөөрч байжээ. Хожим энэ гэрлэлтийг хүчин төгөлдөр бус гэж үзсэн байна. Дуучин Алияа 2001 онд 22 насандаа онгоцны ослоор амиа алдсан юм.
Эх сурвалж: ВВС