6-р сарын 14-нд 2018 оны хөл бөмбөгийн ДАШТ эхлэх гэж байгаа учраас Орос дэлхий дахины анхаарлыг төвд байна. Энэ бол Оросын түүхэн дэх хамгийн том спортын тэмцээн. Үүнийг сайтар зохион байгуулахын тулд нарийн нямбай бэлтгэл хийжээ. Ерөнхийлөгч Путинээс эхлээд жирийн ард иргэд хүртэл тус тэмцээнийг амжилттай зохион байгуулахыг хүсэж байна.
Сүүлийн өдрүүдэд Москвагийн улаан талбай, Арбатын гудамж, Лужник цэнгэлдэх хүрээлэн зэрэг хаа сайгүй дэлхийн олон газрын хөл бөмбөгийн хорхойтнууд цугларч ДАШТ-ний тухай яриа өрнөсөөр.
Тэмцээнийг зохион байгуулахын тулд ОХУ 14 тэрбум ам.доллар зарцуулж, дэлхийн зиндааний спортын талбай байгуулж, дэд бүтцээ сайжруулж, цоо шинэ нисэх буудал, хот дотор аялах төмөр зам барьсан юм. Орос орон хөл бөмбөгийн ДАШТ-ээр рейтингээ өсгөхийг хүсэж байгаагаар барахгүй, Америк, Европын орнууд хоорондын хөшүүн харилцааг өөрчлөхийг хүсэж байгаа.
Энэ талаар ерөнхийлөгч В.Путин хэлэхдээ "ОХУ дэлхий дахинд үүд хаалга, сэтгэл зүрхээ нээлээ. Та бүхэн Орос оронд тавтай морилж, хөл бөмбөгийн ДАШТ-ийг тухлан сууж таалан болгооно уу" гэжээ. Мөн тэрээр “Хөгжөөн дэмжигчдэд дан ганц дэмждэг баг, хайртай тамирчныхаа авьяас чадварыг биш, харин Оросын аугаа их түүх, өвөрмөц соёл, баян тансаг байгаль, Оросын ард түмний чин үнэнч сэтгэл, халуун дотно, найрсаг занг ойлгуулахыг хүсэж байна” гэжээ.
Энэ удаагийн тэмцээнийг тус улсын 11 хотод зохион байгуулна. Дэлхийн хөл бөмбөг сонирхогчид ОХУ-д ирж, хөл бөмбөгийн тэмцээнээ амар тайван үзэхийг баталгаажуулахын тулд аюулгүй байдлын зэрэглэлийг тасралгүй өндөржүүлж, олон арга хэмжээ авсан байна. Тухайлбал, гол гол хотод буу зэвсэг, аюултай бодисыг хатуу хориглон аюултай бодис үйлдвэрлэдэг газруудыг түр хугацаагаар хаажээ. Европын зарим үймээн дэгдээгчдийг хатуу хянаж, хилээр оруулахгүй байхаар шийдвэр гарсан байна. Тасалбар авч чадаагүй хүмүүст зориулж, Москвагийн их сургууль зэрэг их дээд сургууль, цэцэрлэгт хүрээлэнд дэмжигчдийн цэнгүүний бүс гаргасан байна. Мөн гадаадын үзэгчид тасалбараараа дэмжигчийн карт авч, ОХУ-ын хилээр визгүй нэвтрэхээр зохицуулжээ.
Бүртгэлээс үзвэл, ОХУ-ын иргэдийн 74 хувь нь ДАШТ зохион явуулахыг дэмжиж байгаа юм байна. Сочи хотын оршин суугч Греб хэлэхдээ: “Дэлхийн аварга шалгаруулах тэмцээнийг ОХУ зохион байгуулж байгаад баярлаж, бахархаж байна. Энэ тэмцээнийг бид гойд сайхан наадам болно гэдэгт итгэлтэй байна. Заавал газар дээр нь очиж нүдээр үзнэ. Би хэд хэдэн тоглолтын тасалбар авсан” гэжээ.
Барууны зарим хэвлэл ОХУ-д хөл бөмбөг үзэхэд аюулгүй байдлын талаар эргэлзэж байхад, Олон улсын хөл бөмбөгийн холбооны дарга Инфинино ОХУ-ын зохион байгуулалтын ажлыг өндрөөр үнэлж, "ДАШТ-ийг ОХУ маш гайхалтай, амар тайван зохион явуулна" гэж үзэж байна. Тэрээр хэлэхдээ "Инфинино ОХУ-д хөл бөмбөгийн ДАШТ үзэхэд аюулгүй, ОХУ-ын засгийн газар энэ тэмцээнийг ихэд чухалчилж, дэлхийн олон орны хөл бөмбөг сонирхогчдыг урьж байна. Авч буй аюулгүй байдлын арга хэмжээний хувьд урьд урьдын бүх тэмцээнээс илүү сайн болсон" гэж дүгнэжээ.
Испаний тамирчин Мората ОХУ-ын талбайд Тунистэй бэлтгэл хийснийхээ дараа "ОХУ-ын бэлтгэсэн нөхцөл сайн, бэлтгэл сургуулилтаа сэтгэл амар хийх орчин нөхцөл бүрдсэн байна. Миний бодлоор ОХУ-ын цэнгэлдэх хүрээлэн сайн ажиллажээ. Бидний бэлтгэл сургуулилт хийж буй төхөөрөмж гойд сайн юм. Тамирчдад тэмцээндээ улам сайн оролцох бүх нөхцөлийг бүрдүүлсэн байна” гэжээ.
Нэрт дуучин Роби Уиллямс, “Харь гарагийн” хочит хөл бөмбөгийн од Рональдо, Оросын дуучин Аида Гарифуллина нар нээлтийн ёслолд хөл бөмбөг, дуу хөгжмийг хослуулж, ОХУ, Саудын Арабын баг ДАШТ-ний анхны тоглолтыг хийж, тэмцээний салхийг хагалах гэж байна.
Эх сурвалж : Mongol.cri.cn
